Бишекекте 47,3 миллион сомдук алдамчылык жасаган шектүүлөр кармалды

Бишкек шаарынан чет өлкөдөн унаа алып келип берүүнү убадалап жарандын акчасын алдап кеткен шектүүлөр кармалды. Бул тууралуу шаардык милиция билдирди.

Маалыматка ылайык, жабырлануучу милицияга 1-июнда арыз менен кайрылган. Ал 1-май күнү Ш. аттуу аял Кытайдан унаа алдырып берем деген убадасы менен 47 миллион 303 миң 568 сомун алганын, кийин из жашырып кеткенин айткан.

Бул факты боюнча Кылмыш-жаза кодексинин 209-беренесинин (Өзгөчө ири өлчөмдөгү алдамчылык) негизинде кылмыш иши козголгон.

Шектүү катары 1990-жылы туулган К.Ш. жана 1989-жылы туулган С.И. аттуу жарандар кармалып, убактылуу кармоочу жайга киргизилген.

Тергөөдө аларга карата 3төн ашык козголгон кылмыш иштери бар экендиги аныкталган. Учурда тергөө иштери уланууда.

Автор: Кылымбек Бейшеев
Фото: Бишкек ШИИББ