"Өкмөт, элдикине тийишпегилечи!" Депутат Айдарова Баткенде жөлөк пулдар кыркылып жатканын айтты

Бүгүн, 12-сентябрдагы Жогорку Кеңештин жыйынында депутат Айгүл Айдарова Баткен облусунда берилүүчү жөлөк пулдар ар кандай шылтоолор менен кыркылып жатканын айтты.

"Күйөөң Москвага кетти, күйөөң Бишкекте экен" деп пособиелерин коркутуу-үркүтүү менен кат жазып, бербей жатышат. Же болбосо жарым-жартылай берип жатышат. Ошол Баткен элинин пособиесин кыркып, тийишпей эле койсок болбойбу? Бул маселе Баткендики эле эмес, жалпы республиканын көйгөйү болушу керек. Өкмөттөн суранат элем, элдикине тийишпегилечи", - деди депутат айым.

Айдарова чет элге эмгектенгени кеткенде жөлөк пул албайсың деген мыйзам жок экенин, андыктан ар бир жаран өз укугун коргошу керектигин кошумчалады.