Ала-Букада 25 жаштагы жигит октон жаракат алды

Жалал-Абад облусунун Ала-Бука районунда 25 жаштагы жигит октон жаракат алып, ооруканага түштү. Маалыматты ИИМден бүгүн, 13-сентябрда тастыкташты.

Ага ылайык, 12-сентябрда саат 16:55 чамасында Ала-Бука РИИБине Жапа-Салды айылынын ортосунда белгисиз жарандар унаанын артынан кууп келишип, ок чыгаргандыгы маалымдалган.

Анда болжол менен 25-30 жаштардагы балдар өз ара уруша кетип, алардын арасынан бирөө трамватикалык курал менен ок чыгаргандыгы аныкталган. Кароо учурунда 1 даана гилзасы алынган.

Аталган факты Кылмыш-жаза кодексинин 280-беренеси (Бейбаштык) боюнча кылмыш иши козголуп, соттук-медициналык, соттук-биологиялык жана соттук-баллистикалык экспертизалар дайындалган.

Аталган окуяга шектүү катары Ала-Буканын 30 жаштагы тургуну К.Н. кармалып, тергөө кызматына жеткирилген. Шектүү буга чейин Орусияда каракчылык фактысы менен соттолгону маалымдалды.

Ал эми 25 жаштагы жабырлануучу А.Э. райондук ооруканага жеткирилди. Азыркы учурда териштирүү иштери жүргүзүлүүдө.

Автор: Айжанар Рыспек кызы
Фото: ИИМ