Төрага Шакиев кытайлык кесиптеши менен түз аба каттамдарын көбөйтүү маселесин талкуулады

Бүгүн, 13-сентябрда Жогорку Кеңештин төрагасы Нурланбек Шакиев Кытайга болгон расмий сапарынын алкагында Кытай Элдик Саясий консультациялык кеңешинин Бүткүл Кытай комитетинин төрагасы Ван Хунин менен жолугушту.

Парламенттин басма сөз кызматынан билдиргендей, жолугушууда эзелтен коңшу жашаган эки элдин саясий-экономикалык, маданий-гуманитардык байланышын бекемдөө маселелери талкууланып, анын ичинен Жогорку Кеңеш менен Бүткүл Кытай Эл өкүлдөр жыйынынын жана Кытай Элдик саясий консультациялык кеңешинин ортосундагы кызматташтыкты өнүктүрүү тууралуу сөз болду.

Ошондой эле түз аба каттамдарын көбөйтүү маселеси да көтөрүлүп, Ош-Кашкар аба каттамынын ачылышы тыгыз байланышты калыптандырууга көмөкчү болору айтылды.

Жолугушуунун соңунда Шакиев баштаган парламенттик делегация Бүткүл Кытай Эл өкүлдөр жыйынынын жана Кытай Элдик саясий консультациялык кеңешинин ишмердүүлүгү боюнча маалымат алып, жайгашкан имараты менен таанышты.

Автор: Бек Оморбеков