Бишкекте жети тургун мыйзамсыз диний уюмдун идеологиясынан баш тартты (видео)

Бишкекте диний-экстремисттик агымдарга каршы күрөшүү боюнча профилактикалык иш-чаралар өткөрүлдү. Бул туурасында бүгүн, 13-сентябрда УКМКнын маалымат борбору кабарлады.

Маалымдалгандай, атайын кызмат диний-экстремисттик агымдардын идеологиясын жайылтууга каршы аракеттенүүнүн алкагында Бишкек шаарынын аймагында иш алып барган “Йакын инкар” диний-экстремисттик агымынын 7 активдүү мүчөсүнө түшүндүрүү-профилактикалык иш-чараларын жүргүздү.

Иш-чаранын жүрүшүндө аталган жактар агымдын идеологиясынын зыяндуулугун жана туура эместигин толук моюнга алып, өз ыктыяры менен мүчөлүктөн, идеологиясынан баш тартышты.

Мындан тышкары, кайталанбоосу үчүн аларга УКМКнын атынан расмий эскертүү берилгендиги маалыматта кошумчаланган.

Белгилей кетсек, аталган агымга 2017-жылы Кыргызстанда ишмердүүлүгүн жүргүзүүгө сот тарабынан тыюу салынган.