Өлкөдө унаанын бажы төлөмүнөн качкан жаран мамлекетке келтирилген зыянды толуктады

Чет элден унаасын буздуруп, Кыргызстанга кайра келип кураштырып, бажым төлөмдөн качкан жаран кармалды. Бул туурасында бүгүн, 14-сентябрда ИИМдин маалымат кызматы билдирди.

Маалымдалгандай, ал Литвадан тетик иретинде буздуруп, алып келген “Хонда Джаз” үлгүсүндөгү унааны, Кыргызстанга келип кураштырып алган. Аны тетик түрүндө бажы тариздөөдөн өткөрүп, унаа түрүндөгү бажы төлөмүнөн качкан. Ал мамлекетке жалпысынан 441 миң сомдон ашык зыян келтирген жана автоунааны үчүнчү адамдарга сатып жиберген.

Бул факт боюнча Кылмыш-жаза кодексинин 379-беренесинин 3-бөлүмүндө (Документтердин жасалмасын жасоо) кылмыш иши козголуп, Ноокат районунун тургуну 1986-жылы туулган З.Б. кармалган.

Ал келтирилген чыгымдарды толугу менен мамлекетке кайтарып берген. Учурда ушундай багытта иштер кызуу жүрүп жаткандыгы маалыматта кошумчаланган.

Автор: Замира Ниязбекова