Нигерияда суу ташкындан кийин жүздөгөн туткундар түрмөдөн качышты

Нигерияда суу ташкындан түрмөнүн дубалдары урап, 300гө жакын туткун качып кеткен. Бул тууралуу чет элдик басылмалар жазышууда.

Нигериянын түндүк-чыгышындагы Майдугури шаарындагы түрмөнүн дубалдарын сел каптады. Мындан пайдаланып 281 туткун качып кеткенин түрмө жетекчилиги жекшемби күнү билдирди.

Нигериянын түзөтүү кызматынын басма сөз катчысы жети адам коопсуздук операциялары учурунда кармалганын билдирди.

Белгилей кетсек, суу ташкынынан кеминде 30 адам каза болуп, бир миллионго жакын адам жабыркап, жүз миңдеген адамдар жер которуу үчүн лагерлерге мажбур болушкан.