Ошто Тилла каймана аты менен белгилүү кылмыштуу топтун мүчөсү кармалды (видео)

Ош облусунда уюшкан кылмыштуу топтун мүчөсү алдамчылыкка шектелип кармалды. Бул тууралуу бүгүн, 16-сентябрда облустук милиция билдирди.

Маалыматка ылайык, 11-сентябрда милицияга Кара-Суу районунун 57 жаштагы тургуну арыз менен кайрылган. Ал 10-июль күнү И. аттуу жаран Daewoo Matiz үлгүсүндөгү унаасын "убактылуу пайдаланып турайын" деп алып, башка бирөөгө карызын төлөө үчүн берип жибергендигин айткан.

Чогултулган материалдын негизинде Кылмыш-жаза кодексинин 209-беренесинин (Алдамчылык) негизинде кылмыш иши козголуп, тергөө амалдары башталган.

Шектүү катары мурда соттолгон Кара-Суу районунун 1986-жылы туулган И.И. аттуу тургуну кармалып, убактылуу кармоочу жайга киргизилген. Ал Тилла каймана аты менен ИИМдин каттоосунда уюшкан кылмыштуу топтун мүчөсү катары турары такталган.

"Тергөөнүн жүрүшүндө шектүүнүн үстүнөн дагы 3 жабырлануучудан ушундай эле мазмундагы арыздар түшүп, текшерүү иштери жүргүзүлүүдө. Жабырлануучуларга келтирилген зыяндын болжолдуу суммасы 4 миллион 800 миңден ашуун. Шектүү жарандар менен сүйлөшкөндө Өзбекстандын криминалдык чөйрөсүндөгү таанымал адамдар менен түшкөн сүрөттөрүн көрсөтүп жүргөндүгү маалым болду", - деп айтылат маалыматта.

Учурда шектүүнүн башка кылмыштарга тиешеси бардыгын аныктоо боюнча иштер жүргүзүлүүдө.