"Чоңдор башка убакыт тапса". Депутат Масалиев Манас көчөсүндөгү тыгын көйгөй болуп жатканын айтты

Бүгүн, 17-сентябрдагы Жогорку Кеңештин Транспорт, коммуникациялар, архитектура жана курулуш боюнча комитетинин жыйынында депутат Исхак Масалиев Бишкектеги жол тыгын жоюлбай жатканын айтып, комитетке мэриянын имаратында көчмө жыйын өткөрүүнү сунуштады.

Анын айтымында, Чапаев көчөсүнөн Манас проспектисине чейин унаа тыгыны пайда болуп жатат.

"Карасам Манас көчөсүндө бир мезгилде атайын унаа коштоосу менен кетип бара жатат. Ошондой убакта чоңдор башка убакыт тапса жакшы болот эле. Канча "Тез жардам" унаасы турат, канча киши турат? Канча адам кечигип жатат?" - деди депутат.

Ошондой эле Масалиев мэриянын троллейбустарды алуу, мектептерде жана ЖОЖдордо окуунун башталышынын графиктерин өзгөртүү иштери тыгынды жоё албай жатканын белгиледи.