Депутат Сулайманов: "Ысык-Көлдө скутерлерди колдонууга тыюу салуу керек" (видео)

Бүгүн, 17-сентябрдагы Жогорку Кеңештин Транспорт, коммуникациялар, архитектура жана курулуш боюнча комитетинин жыйынында депутат Элдар Сулайманов Ысык-Көлдө скутерлердин жүрүүсүнө тыюу салуу керектигин айтты.

Депутаттын айтымына караганда, скутерлер менен байланышкан кырсыктар көп катталып, адам өлүмү менен коштолуп жатат.

"Баарыбызга белгилүү болгондой, гидроциклдер (скутер) боюнча көйгөйлөр көп болууда. Быйыл дагы өлүм болду, буга чейин деле болгон.

Ошондой эле эң маанилүүсү экология жабыркап жатат. Билесиңер, алардын түтүнү, майы баары сууга кетет. Сууга түшкөн кичинекей балдар, туристтер ошол зыяндуу заттарды жутуп алышат. Ошондуктан Ысык-Көлдө скутерлерди колдонууга тыюу салууну сунуштайм. Депутаттардан бул мыйзам долбоорду колдоп берүүнү суранат элем", - деди эл өкүлү.

Ал эми Жогорку Кеңештин Транспорт, коммуникациялар, архитектура жана курулуш комитети Ысык-Көлдө гидроцикл тебүүгө тыюу салган мыйзам долбоорун биринчи окууда колдоду.