Израилдин бийлиги аскерлердин ыйгарым укуктарын кеңейтүү боюнча атайын жобону жарыялады (видео)

Израилдин өкмөтү дүйшөмбү күнү бүткүл өлкө боюнча аскерлерге жарандардын ишмердүүлүгүн чектөө боюнча буйруктарды берүүгө уруксат берген жобо киргизилгенин жарыялады. Бул тууралуу Haaretz гезити жазды.

Анын айтымында, мындай жобону киргизүү Израилдин Коргоо күчтөрүнүн (IDF), тактап айтканда, адамдардын өмүрүн сактап калуу үчүн чогулуштарга тыюу салуу, окуу процессине чектөөлөрдү киргизүү, ошондой эле бир катар башка талаптарды кароо боюнча ыйгарым укуктарын олуттуу кеңейтет.

Маалым болгондой, Израилдин согуштук учактары жана учкучсуз учактары кечээ, 23-сентябрдан бери Ливандагы 1400дөн ашык ок-дарыларды колдонуп, "Хезболла" менен байланышы бар 1100дөн ашуун бутага сокку урду.

Бул арада "Хезболла" Израилге ракета жана учкучсуз учактар менен чабуулун улантууда. Израилдик маалымат каражаттарынын билдирүүсүнө караганда, 2023-жылдын 7-октябрында согуштук аракеттер башталгандан бери биринчи жолу алыс аралыкка учуучу ракеталар колдонулууда. Израиль тараптан каза болгондор тууралуу маалымат жок. Израиль армиясы снаряддардын көбү кармалганын билдирди.

Израилдин 23-сентябрдагы "Хезболланын" буталарына жасаган ири соккуларынын натыйжасында, ливан тараптын маалыматы боюнча, 492 адам, анын ичинде 35 бала жана 58 аял набыт болгон. Ливандын мамлекеттик маалымат агенттиги NNA билдиргендей, каза болгондордун арасында "Тез жардам" кызматынын кызматкерлери да бар. Дагы 1645 адам жаракат алган.