Владимир Путин өзөктүк куралды колдонуунун жаңы шарттарын атады

Орусиянын президенти Владимир Путин өзөктүк куралды колдонуу принциптерин өзгөртүүнү жана өзөктүк куралды токтотуу жаатындагы мамлекеттик саясаттын негиздерин жаңылоону сунуштады. Бул тууралуу Путин кечээ, 25-сентябрда Орусиянын Коопсуздук кеңешинин жыйынында билдирди.

"Өзөктүк куралы жок кандай мамлекет болбосун анын Орусияга жасаган агрессиясы, же өзөктүк мамлекеттин колдоосу менен Орусияга агрессия жасаса, аны Орусияга каршы биргелешкен чабуул катары кароо сунушталууда", - деген Путин.

Ал иштеп жаткан нормаларды оңдоо зарылдыгын азыркы аскердик-саясий кырдаалдын өзгөрүшү жана Орусия жана анын союздаштары үчүн аскердик коркунучтардын жана тобокелдиктердин жаңы булактарынын пайда болушу менен байланыштырды.

Ошондой эле Путин Орусия аэрокосмостук чабуул куралдарын массалык түрдө учуруу тууралуу ишенимдүү маалымат алгандан кийин өзөктүк куралды колдонуу мүмкүнчүлүгүн карай турганын кошумчалаган.

"Орусиянын өзөктүк куралды колдонууга өтүүсүнүн шарттары да так көрсөтүлгөн. Биз аэрокосмостук чабуул куралдарын массалык түрдө учуруу жана аларды биздин мамлекеттик чек арадан кесип өтүү жөнүндө ишенимдүү маалымат алгандан кийин бул мүмкүнчүлүктү карап чыгабыз. Мен стратегиялык жана тактикалык учактарды, канаттуу ракеталарды, учкучсуз учактарды, гиперүн жана башка учактар жөнүндө айтып жатам", - деп кошумчалаган орус президенти.

Автор: Азат Бейшенбеков