Москвада мыйзамсыз легалдаштырууга шектелип миңден ашык мигрант кармалды (видео)

Москвада курулуш тармагындагы жасалма компаниялар аркылуу миңден ашуун мигрантты мыйзамдаштырган уюшкан топтун ишмердүүлүгү токтотулду. Бул тууралуу Орусиянын Ички иштер министрлигинин Москва башкармалыгынын басма сөз кызматы билдирди.

Башкармалыктын айтымында, схеманын катышуучулары курулуш менен алектенген фигурант аркылуу коммерциялык уюмдарды түзүшкөн. Андан соң топтун мүчөлөрү мигранттар менен жасалма эмгек келишимдерин түзүп, алардын Орусияда жүрүү мөөнөтүн узартууга мүмкүнчүлүк беришкен.

Схеманын катышуучулары кардарларды мессенжерлер аркылуу издешкен. Айрым мигранттар досторунун сунушу менен кайрылышкан. Ал эми алар көрсөткөн кызматы үчүн 5 миңден 10 миң рублга чейин сурашкан.

"Көмүскө бизнестен түшкөн алдын ала киреше 5 миллион рублдан ашат, ал эми легалдаштырылган чет элдиктердин саны миңден ашат", - деп айтылат маалыматта.