Крымда учкучсуз учактын чабуулунан кийин мунай базасы өрттөнүп кетти (видео)

Крымда 7-октябрга караган түнү Феодосиядагы мунай базасында өрт чыккан. Бул тууралуу чет элдик басылмалар жазышууда.

Шаар бийлиги өрттүн кесепетинен муниципалдык мүнөздөгү техногендик өзгөчө кырдаал киргизилгенин билдирди. Бирок кийинчерээк администрация бул маалыматты четке кагып, аны “техникалык ката” деп атады.

"Мунай базага чектеш эки көчөдө унаа кыймылы жабылды. Өрттү өчүрүү иштерин Орусиянын Өзгөчө кырдаалдар министрлигинин кызматкерлери жүргүзүүдө. Курман болгондор жана жабыркагандар жок", - дейт Феодосия администрациясынын башчысы Игорь Ткаченко.

Мэрия өрттүн келип чыгуу себептери тууралуу эч нерсе айткан эмес.

Орусиянын Коргоо министрлиги түндө нөөмөттө турган Абадан коргонуу күчтөрү Украинанын 12 учкучсуз учагын Крымда, 6 учакты Курск облусунда, ал эми Белгороддо, Брянскта, Воронежде бирден учкучсуз учакты жок кылганын билдирди.

“Крым шамалы” басылмасы окуянын күбөлөрүнө таянып, 7-октябрга караган түнү Крымдагы Саки жана Бельбек аскерий аэродромдоруна да чабуул жасалганын жазды.