Казакстандын эки облусунан чыккан ири өрт 45 миң гектар жерди каптады

Казакстандын Өзгөчө кырдаалдар министрлиги Караганды облусунда өрттү өчүрүүнүн чоо-жайын билдирди.

Казакстандын ӨКМ кызматынын маалыматына ылайык, өрт кырсыгы чыккан жерлерде өрткө каршы штабы ишин улантууда. Караганды облусунда алдын ала 35 миң гектар ачык жерде куураган чөп күйүүдө. Өрттү өчүрүү катуу шамал, тоолуу рельеф жана өрткө кирүүчү жолдордун жок болгону үчүн татаал болууда.

Анда өрт кырсыгын жоюу үчүн 386 адам, 64 техника, ӨКМ жана Коргоо министрликтеринен тик учактар тартылган. Табигый өрттү өчүрүүгө тартылган күчтөр жана каражаттар төрт күжүрмөн бөлүккө бөлүнөт. Жалпысынан 50 тоннадан ашык сууну түзгөн 30 агызма жасалган.

"Караганды жана Павлодар облустарынын аймагында чыккан өрттүн жалпы аянты болжолдуу түрдө 45 миң гектарды түздү", - деп айтылат маалыматта.

Буга чейин өрт Караганды облусунан Павлодар облусунун аймагына өткөн. Өзгөчө кырдаалдар министрлиги Павлодар облусунун Желтау айылында жашаган 18 тургун, анын ичинде 8 бала эвакуацияланганын билдирген.

Эске салсак, 7-октябрда Караганды облусунун Каркаралы районунда өрттү өчүрүү учурунда ПЧ-24 улук өрт өчүрүүчү-куткаруучу Хайрат Хали каза болуп, дагы төрт адам жабыркаган.