Ала-Букадагы билим берүү бөлүмүнүн кызматкерлерине кылмыш иши козголду

Жалал-Абад облусунун Ала-Бука районунун билим берүү бөлүмүнүн кызматкерлери коррупцияга шектелүүдө. Бул тууралуу Башкы прокуратура билдирди.

Маалыматка ылайык, алар Эсептөө палатасынын текшерүүлөрүнүн жыйынтыгын жакшыртуу жана мыйзам бузууларды жаап-жашыруу үчүн өздөрүнүн ыйгарым укуктарын кыянаттык менен пайдаланышып, мектеп жана бала бакчалардын жетекчилеринен мыйзамсыз акча чогултушкан.

Бул факты боюнча Жалал-Абад облусунун прокуратурасы тарабынан Кылмыш-жаза кодексинин 336-беренеси (Коррупция) менен кылмыш иши козголуп, тергөө иштерин жүргүзүү үчүн УКМКнын Жалал-Абад облусттук башкармалыгына өткөрүлүп берилди.

Автор: Кылымбек Бейшеев
Фото: Иллюстрациялык сүрөт