"БАЭден унаа алып келип берем". Бишкекте шаар тургунунун 29,5 миң долларын алдап алган шектүү кармалды

Ички иштер министрлиги ири өлчөмдөгү алдамчылыкка шектелген жаран кармалганын кабарлады.

Маалыматка ылайык, милицияга Бишкек шаарынын тургуну арыз менен кайрылып, август айында Б.Б. аттуу жаран 29 миң 500 долларын алдап кеткенин билдирген. Анын айтымында, шектүү ага Бириккен Араб Эмиратынан Lexus GX-460 үлгүсүндөгү унааны алып келип берүүнү убадалаган.

Бул факты боюнча Кылмыш-жаза кодексинин 209-беренеси (Алдамчылык) менен кылмыш иши козголгон. Шектүү кармалып, соттун чечими менен убактылуу кармоочу жайга киргизилген.

Учурда тергөө иштери уланууда.

Автор: Кылымбек Бейшеев
Фото: ИИМ