Бишкекте клиника дарыгери баңгизаттык дарыларды уурдоого шектелип кармалды (видео)

Бишкек шаарындагы балдар клиникасынын 33 жаштагы анестезиолог-реаниматологу кармалды. Бул тууралуу бүгүн, 9-октябрда Ички иштер министрлиги билдирди.

Маалыматка ылайык, ал кызмат абалынан пайдаланып, клиника директорунун атынан дарыны алууга уруксат берген жасалма каттарды даярдап келген. Анын негизинде дарыгер ооруканадан 1340 ампуладагы күчтүү дары-дармектерди уурдап кеткен.

Бул факты боюнча Кылмыш-жаза кодексинин 286-беренесинин (Баңгизат каражаттарын же психотроптук заттарды уурдоо же болбосо опузалап алып коюу) жана 291-беренесинин (Баңгизат каражаттарын, психотроптук заттарды жана алардын аналогдорун алууга документти мыйзамсыз берүү же болбосо жасалма жасоо) негизинде кылмыш иши козголгон. ИИМ шектүүгө тийиштүү соттук экспертизалар дайындалып, корутундусу менен укуктук баа берилерин белгиледи.

Учурда окуянын бардык жагдайларын аныктоо үчүн иликтөө иштери жүрүүдө.