Араван районундагы мектептин мурдагы директору кылмыш жоопкерчилигине тартылды

Ош облусунун Араван районундагы мектептин мурдагы директору кызмат абалынан кыянаттык менен пайдаланган деп шектелүүдө. Бул тууралуу Ички иштер министрлиги билдирди.

Маалыматка ылайык, Ош мамлекеттик университетин гранттык негизде 2018-жылы аяктаган 28 жаштагы жаран Араван районундагы мектептердин биринин мурдагы директору менен ич ара сүйлөшүп, мыйзамсыз эмгек китепчесин алган.

Мурдагы директор аны мектепте иштебей калганына карабастан 2019-2022-жылдардагы жалган буйруктарды каттоо журналына бош орунга жазып койгон. Ошондой эле эмгек китепчесине тарых мугалими болуп жумушка орношкону тууралуу жазуу киргизген. Ал учурда 28 жаштагы жаран өлкө аймагынан тышкары жүргөн.

Бул факты боюнча Кылмыш-жаза кодексинин 337-беренесинин (Кызмат абалынан кыянаттык менен пайдалануу) негизинде кылмыш иши козголгон.

ИИМ 40 жаштагы шектүү кылмыш жоопкерчилигине тартылып, кылмыш ишин кароо үчүн сотко жөнөтүлгөнүн белгиледи.

Автор: Кылымбек Бейшеев
Фото: ИИМ