Чүйдө 78 жаштагы чоң эненин үйүнө кирип барып, ур-токмокко алган шектүү кармалды

Чүй облусунун Москва районунда кары аял кишини карактоого шектелген жаран кармалды. Бул тууралуу бүгүн, 10-октябрда облустук милиция билдирди.

Маалыматка ылайык, окуя 8-октябрда саат 11:30 чамасында Беловодское айылында болгон. Ал күнү 43 жаштагы жаран 78 жаштагы тургундун үйүнүн тосмосунан мас абалында секирип кирип, кары адамды ур-токмокко алып, анын Redmi үлгүсүндөгү телефонун тартып алган соң изин жашырып кеткен.

Бул факты боюнча Кылмыш-жаза кодексинин 206-беренесинин (Каракчылык) негизинде кылмыш иши козголгон. Шектүү катары мурда соттолгон 43 жаштагы жаран кармалып, убактылуу кармоочу жайга киргизилди.

Учурда кылмыш иши боюнча соттук-медициналык экспертиза дайындалып, тергөө иштери уланууда.

Автор: Кылымбек Бейшеев
Фото: Чүй ОИИБ