ИИМ Бишкетеги атышуунун чоо-жайы боюнча маалымат таратты (видео)

Бишкетеги 7-кичи районунда болгон ок атышуунун чоо-жайы белгилүү болду. Окуянын катышуучуларынын ортосунда пикир келишпестиктен бирөө каза болуп, экөө ооруканада экендигин Ички иштер министрлиги кабарлады.

Алдын ала маалыматтарга ылайык, Ы. М. менен Н.Ж. ортосунда финансылык келишпестиктер болуп, ошол себептен Ы.М., Н.Ж. жана С.Э. иштеген 7-кичи районунда жайгашкан машыгуу залына келген.

Алгачкы ыкчам тергөө иш-чараларга ылайык, Ы. М. аттуу жаран Н.Ж.нын иштеген жумушуна келип, ага өз дооматтарын койгон.

Андан кийин өзүнө катталган Сайга мергенчилик мылтыгы менен Н.Ж. аттуу жарандын курсагына ок чыгарган. Мылтыктын стволун алып салуу максатында аны менен күрөшүп кирген С.Э. аттуу жарандын бутуна да аткан.

Бул коргонуунун жүрүшүндө кол салган Ы.М. аттуу жарандын өзүнүн башына кокустан ок атылып, ошол жерден каза болгон.

Бул факт боюнча Октябрь РИИБинин тергөө кызматы Кылмыш-жаза кодексинин 122-беренеси (Адам өлтүрүү) менен кылмыш ишин козгоду.

Азыркы учурда чыныгы жагдайларды аныктоого жана юридикалык баа берүүгө багытталган ыкчам тергөө иш-чаралардын топтому жүргүзүлүп жаткандыгы маалыматта белгиленет.

Ошондой эле Н.Ж. жана С.Э. дарылоо мекемесинде жатышканы, кылмыш ишин иликтөөнүн жүрүшү ИИМдин жетекчилигинин жеке көзөмөлүнө алынганы кабарда кошумчаланат.