"Ош базарында" күчтүү таасир этүүчү дарыларды мыйзамсыз саткандар текшерүүчүлөргө кол салгандыгы айтылды

"Ош базарында" күчтүү таасир этүүчү дарыларды мыйзамсыз сатуу фактылары аныкталды. Бул туурасында бүгүн, 11-октябрда Саламаттык сактоо министрлиги билдирди.

Маалымдалгандай, кечээ, 10-октябрда Дары-дармек жана медициналык буюмдар департаментинин адистери Ленин райондук милиция кызматкерлери менен биргеликте дарыкана наркоманиясын алдын алуу максатында рейд жүргүзгөн.

Анын жүрүшүндө «Ош базарынын» жана «Берекет-Универсал» ЖАКынын аймагында жеке жактар тарабынан лицензиясыз ишкердик жүргүзүү жана күчтүү таасир этүүчү дары-дармектерди мыйзамсыз сатуу фактылары аныкталган.

"Мыйзамсыз түрдө дары-дармектерди жана медициналык буюмдарды саткан ишкерлердин бири бычак менен департаменттин кызматкерлерине кол салган. Аларга карата арыз жазылган", - деп айтылат маалыматта.

Автор: Замира Ниязбекова