Бишкекте 19 жана 25 жаштагы "закладчиктер" кармалды

Бишкекте синтетикалык баңгизатты таркатуучу жарандар кармалышты. Бул тууралуу бүгүн, 14-октябрда Ички иштер министрлигинен билдирди.

Маалыматка ылайык, 2-октябрда ири өлчөмдөгү синтетикалык заттардын кыстырмаларын жасап, андан ары таратууну көздөп жаткан 2005-жылы туулган Ф.И. жана 1999-жылы туулган Б.Ж. аттуу жарандар кармалган.

Кармалган жарандар мурда психотроптук заттарды алган жерин жана координаттарын көрсөтүп, ошондой эле психотроптук заттарды мыйзамсыз таркатуучулар (закладчик) экенин айтышкан. Алар адегенде белгисиз адам (куратор) менен жазышып, баңгизаттарды ири өлчөмдө алып, андан кийин пакеттерге салып, дозалап сатуу максатында Бишкек шаарынын аймагында кыстырмаларга катып коюшкан.

Шектүүлөр Бишкек ШИИБинин убактылуу кармоочу жайына киргизилди.

Автор: Бек Оморбеков