Бишкекте мыйзамсыз курал-жарак сатууга шектүү кармалды

Бишкекте курал-жарак жана ок-дарыларды мыйзамсыз сатууга шектүү жаран кармалды. Бул жөнүндө Бишкек ШИИББи бүгүн, 14-октябрда маалымдады.

Милицияга ок атуучу куралдары жана ок-дарыларды алып жүргөн уюшкан кылмыштуу топтун мүчөлөрүнө карата ыкчам маалымат келип түшкөн.

Аталган факты Бишкек милициясына катталып, териштирүү иштери башталган.

Ага удаа “Бандит” аталышындагы алдын алуу иш-чараларынын алкагында Чүй проспектиси менен Осмонкулов көчөлөрүнүн кесилишинде Тойота Камри 70 үлгүсүндөгү унаа токтотулган. Анда ИИМдин каттоосунда турган, мурда соттолгон, мыйзамдагы ууру Камчы Көлбаевдин уюшкан кылмыштуу тобунун активдүү мүчөсү болгон Т.Ж. аттуу жаран аныкталып, кармалган.

Жогорудагы автоунааны тинтүү учурунда сайсыз ок атуучу курал, 2 даана гранатасы бар барсетка, 5,45 калибрдеги 30 даана ок-дары, эки 9 мм калибрдеги ок-дары, 2 даана бычак жана 6 даана уюлдук телефон табылып, тиешелүү экспертизалар дайындалды.

Бул боюнча Кылмыш-жаза кодексинин 267-беренесине (Курал-жарак, ок-дарыларды мыйзамсыз жүгүртүү) ылайык кылмыш иши козголгон. 29 жаштагы шектүү Т.Ж. убактылуу кармоочу жайга киргизилди.

Тергөө иштери улантылууда.

Автор: Айжанар Рыспек кызы
Фото: Бишкек ШИИББ