Министрлик ЖОЖдордогу жаңы графикти өзгөртүү боюнча президенттик аппаратка кат жолдоду

Билим берүү жана илим министрлиги Бишкектеги ЖОЖдор менен колледждерге киргизилген жаңы окуу графигин өзгөртүүнү өтүнүп, президенттик аппаратка кат жолдоду. Маалыматты бүгүн, 16-октябрда министрликтин басма сөз кызматы тастыктады.

Белгилей кетсек, ушул жылдын августунда калаадагы жол тыгынын жоюу максатында окуу графиги өзгөртүлгөн. Ага ылайык, жогорку окуу жайларда, кесиптик лицейлерде жана колледждерде сабактар 10:00дөн кийин башталса, ал эми мектептердеги сабактар саат 8:00гө чейин башталат.

11-сентябрдагы Жогорку Кеңештин жыйынында бир катар депутаттар окуу графигине нааразы болуп, маселени кайра карап чыгуу керектигин айтышкан.

Маалымат үчүн: Бишкекте 121 мектепте 228 миң 9 бала окуйт. Ошондой эле 129 кесиптик билим берүү уюму (36 жогорку, 77 орто кесиптик окуу жайы жана 16 кесиптик лицей) жайгашкан, аларда 167 727 студент билим алат.

Автор: Айжанар Рыспек кызы
Фото: Интернеттен алынды