Таш көчкү түшкөн Арал-Казарман жол тилкеси каттамдар үчүн бир тараптуу ачылды

Түндүк-Түштүк альтернативдик унаа жолундагы Арал-Казарман тилкесиндеги 270-271-чакырымдар аралыгы тазаланды. Бул туурасында бүгүн, 17-октябрда Транспорт жана коммуникациялар министрлигинин маалымат кызматы билдирди.

Маалымдалгандай, учурда унаалар үчүн бир тараптуу каттам берилди. Жеринде № 18 жол тейлөө ишканасынын кызматкерлери жана атайын техникалар иштеп жатышат.

Министрлик азыркы тапта бир тараптуу каттам бар экенин, тазалоо иштери уланып жаткандыгын маалыматта кошумчалаган.

Белгилей кетсек, кечээ, 16-октябрь күнү нөшөрлөп жааган жамгырдан улам тоо бетинен таштар кулап, жолдун аталган аралыгын жаап калган. Таш көчкүнүн көлөмү болжол менен 3000 метр кубду түзүп, тазалоо иштери дароо башталган.

Автор: Замира Ниязбекова