Ат-Башы районунун тургуну 8 килограммдан ашык баңгизат менен кармалды

Нарын облусунун Ат-Башы районунун тургуну 8 килограмм 580 грамм баңгизат менен кармалды. Бул туурасында Ички иштер министрлигинин маалымат кызматы кабарлады.

Маалымдалгандай, 12-октябрда райондук жана облустук баңгизаттарды мыйзамсыз жүгүртүүгө каршы күрөшүү кызматынын кызматкерлери тарабынан Бишкек-Нарын-Торугарт автожолунан VOLVO-FH үлгүсүндөгү оор жүк ташуучу автоунаа токтотулган.

"Текшерүү учурунда унаадан бир даана боз түстөгү капка салынган өсүмдүк тектүү өзгөчө жыты бар зат табылган. Соттук-химиялык экспертизанын корутундусуна ылайык, аталган зат марихуана экендиги аныкталган. Анын жалпы салмагы 8 килограмм 580 граммды түзгөн.

Аны Ат-Башы районунун туругуну Жети-Өгүздөгү талаалардын биринен алып келе жатканын айткан", - деп айтылат маалыматта.

Бул факты боюнча Кылмыш-жаза кодексинин 283-беренеси (Баңгизат каражаттарын, психотроптук заттарды жана алардын аналогдорун сатып өткөрүү максатысыз мыйзамсыз даярдоо) менен кылмыш иши козголгон.

Шектүү катары кармалган 1977-жылы туулган Ат-Башы районунун тургуну И.У. соттун чечими менен 2 айлык мөөнөткө камакка алынды.

Учурда кылмыш иши боюнча тергөө амалдары улантылууда.

Автор: Замира Ниязбекова