Орусиянын Мамлекеттик Думасы мигранттарга байланыштуу бир катар мыйзамдарга өзгөртүүлөрдү киргизди

Орусиянын Мамлекеттик Думасы пленардык жыйында миграциялык мыйзамдарга өзгөртүү киргизген бир катар долбоорлорду биринчи окууда жактырды. Бул туурасында орус басылмалары жазышты.

"КоммерсантЪ" басылмасы билдиргендей , алардын бири мигранттар үчүн комплекстүү экзаменди уюштуруу жана өткөрүү боюнча укуктарды жана милдеттерди үчүнчү жактарга берүүгө тыюу салуу киргизилди. Эми мигранттарды сынактан өткөрө турган билим берүү уюмдарынын тизмесин түзүүнү өкмөт гана жүргүзөт.

Кошумчалангандай, мыйзамсыз миграцияны уюштуруу үчүн колдонулган документтерди бурмалоо үчүн юридикалык жактардын жоопкерчилигин караган мыйзам долбоору да биринчи окууда кабыл алынды. Алар биринчи жолу мыйзамды бузса 5 миллиондон 10 миллион рублга чейин айып пулга жыгылат. Ал эми кайталанган эреже бузуулар үчүн 10 миллиондон 60 миллион рублга чейин айып пул менен жазаланат. Учурда мындай мыйзам бузуучулар 1 миллион рублга чейин айыпка тартылууда.

Ал эми миграциялык документтерди мыйзамсыз жасатып, колдонгондор 100 миң рублга чейин, кайталап бузуулар үчүн 100 миңден 300 миң рублга чейин айып пул салынат. Учурда жаза 30 миңден 50 миңге чейин жана 50 миңден 100 миң рублга чейин каралган.

Миграция чөйрөсүндө мыйзамсыз кызматтарды көрсөтүү жана мыйзамсыз миграцияны уюштуруу ыкмалары боюнча сунуштары бар сайттардын ишине бөгөт коюу боюнча мыйзам долбоору биринчи окууда кабыл алынды. Учурда “Маалымат, маалыматтык технологиялар жана маалыматты коргоо жөнүндө” мыйзамга өзгөртүүлөр киргизилип жаткандыгы маалыматта кошумчаланган.

Автор: Замира Ниязбекова