Байсалов Иньчуань шаарында өткөрүлгөн "Кытай — Борбордук Азия" 11-кызматташтык форумуна катышты

Министрлер кабинетинин төрагасынын орун басары Эдил Байсалов Кытайдын Нинся-Хуэй автономдуу районунун Иньчуань шаарында өткөрүлгөн “Кытай — Борбордук Азия” 11-кызматташтык форумуна катышты. Бул тууралуу бүгүн, 28-октябрда өкмөттүн басма сөз кызматынан билдирди.

Маалымдалгандай, Байсалов өз сөзүндө бул иш-чара Борбордук Азия өлкөлөрү менен Кытайдын ортосундагы салттуу достук мамилелердин тереңдешине жана кеңейишине жаңы динамика кошорун билдирди. Ал 11-форумдун “Жалпы үй куруу үчүн жашыл экономиканын өнүгүүсүнө көмөктөшүү” темасынын актуалдуулугун белгилеп, жашыл экономиканы өнүктүрүү туруктуу келечектин зарыл элементине айланып баратканына көңүл бурду.

Кыргыз делегациясынын башчысы ошондой эле Кыргызстанда 2027-жылы пландаштырылган “Тоолуу аймактарды өнүктүрүү боюнча беш жылдык аракеттердин 2023-2027-жылдарга” жана “Бишкек+25” Экинчи Глобалдык Тоо саммитин ишке ашыруунун маанилүүлүгүн белгиледи. Муну менен катар ал Кыргызстан, Казакстан жана Өзбекстан "Камбар-Ата-1" ГЭСин жана Кытай-Кыргызстан-Өзбекстан темир жолун куруу долбоорлору боюнча маселелерди биргелешип илгерилетүү, ошондой эле масштабдуу долбоорлорду ишке ашыруу боюнча маалымат берди.

Мындан тышкары “Кытай менен Борбордук Азиянын кызматташтыгынын жетишкендиктери” фотокөргөзмөсү менен таанышып, 11-кызматташтык форумунун аллеясында көчөт отургузуу аземине катышты.

Автор: Айпери Бакталбек кызы