Ош-Сары-Таш-Эркештам унаа жолунун айрым чакырымдары убактылуу жабылды

Бүгүн, 28-октябрда Ош облусунун Алай районунун Сары-Таш айылынан Нура айылына чейинки жолу убактылуу жабылды. Бул туурасында ӨКМдин маалымат кызматы билдирди.

Маалымдалгандай, Ош-Сары-Таш-Эркештам унаа жолунда кар жаап, бороон жүрүп жатат.

"Жарандардын кырсыкка кабылуусуна жол бербөө жана жол тыгындарын болтурбоо максатында саат 12:00дөн тартып Ош-Сары-Таш-Эркештам унаа жолунун 184-чакырымынан 250-чакырымына чейин унаалардын бардык түрүнө убактылуу чектөө киргизилди. Кошумча маалымат берилет", - деп айтылат маалыматта.

Белгилей кетсек, Төө-Ашуу ашуусунда да кар жаап жаткандыгына байланыштуу оор жүк ташуучу унааларга чектөө киргизилген.

Автор: Замира Ниязбекова