"Жаңылап койсок анын эмнеси жаман?" Садыр Жапаров гимнди өзгөртүү боюнча комментарий берди

Бүгүн, 30-октябрда президент Садыр Жапаров мамлекеттик гимнди өзгөртүү боюнча "Кабар" агенттигине комментарий берди. Анда мамлекет башчысы суроолого жооп берип жатып гимнди өзгөртүү керектигин билдирген.

"Өзгөртүп койсок жакшы эле болот. Жаңылап койсок анын эмнеси жаман? Азыркы гимнибиз 33 жыл мурда азаттыкка чыгып, эгемендүүлүк алган жылдарда жазылган. Мына биз азат болдук, мына биз эгемен өлкө болдук, кыргыз эли өз тагдырың колуңда, алгалай бер деп ошол мезгилде гимн жазгандар кубаныч менен толкундануу менен жазышкан. Андан бери 33 жыл өттү. Биз мамлекет катары толук калыптандык. Дүйнө жүзүнө таанылдык. Эми жүз жыл өтсө да азаттыкка чыктык, эгемен өлкө болдук деп ырдап жүрө беребизби?

Ошондуктан эми өз алдынча мамлекет экенибизди, 5 миң жылдык тарыхыбыз бар эл экенибизди ырдап, жаштарга, келечек муундарга дух бере турган гимн жазып койсок эмнеге болбосун? Албетте, азыркы гимнибиз дагы унутта калбайт. Биринчи гимнибиз катары архивде тарых болуп кала берет. Тууну оңдоп коёлу дегенде да айрым демогог, популисттер каршы чыгышты эле. Азыркы туубуз жаман болдубу? Мурдагы туудан бир тепкич өйдө болду. Мурдагы туубуздагы күндүн белгиси же күн карама эмес, же «пилораманын» арасы эмес, түшүнүксүз эле белги болчу. Азыркы тууну көргөн адам дароо эле күндүн нуру экенин түшүнөт. Жаркырап турат", - деп белгилеген мамлекет башчысы.

Белгилей кетсек, спикер иш-чаралардын биринде сөз сүйлөп жатып мамлекеттик гимнди өзгөртүү боюнча өз пикирин айткан. Ал коомчулуктун кызуу талкуусуна түштү.

Ал арада мамлекет башчысынын маалымат катчысы Аскат Алагөзов маалымат берип, "гимн өзгөрөт экен деп дүрбөлөң түшүүгө негиз жок" деп коомчулукту жоошуткан. Жана да Жогорку Кеңештин төрагасы айткан пикирди анын жеке көз карашы экендигин билдирген болчу.

Автор: Замира Ниязбекова