Зеленский Курскиде Түндүк Кореянын аскерлеринин саны 11 миңге жеткенин айтты

Украинанын президенти Владимир Зеленский Орусиянын Курск аймагында Түндүк Кореядан келген аскер кызматкерлеринин саны көбөйгөнүн билдирди. Анын айтымында, аймакта Түндүк Кореянын 11 миң жоокери бар. Бул тууралуу чет элдик басылмалар жазышууда.

Ал бул маалыматты Коргоо министрлигинин Башкы чалгындоо башкармалыгы менен Тышкы чалгындоо кызматынан алганын билдирген.

Буга чейин мамлекет башчысы АКШ, Улуу Британия жана Германия "керектүү аралыктын ордуна жөн эле Түндүк Кореянын аскерлеринин украиндерге сокку уруп башташын күтүп жатышат” деп нааразы болгон.

Европа биримдигинин тышкы саясат боюнча башкы комиссары Жозеп Боррел 4-ноябрда Түштүк Кореяны Украинаны колдоону күчөтүүгө чакырган.