Бек Борбиевдин концертинде "Жылдын супер ырчы мырзасы" Нурлан Насип элди Жылкы жылы менен куттуктап, ыр белек сунду

Бүгүн, 2-январда Кыргыз Республикасынын Эмгек сиңирген артисти, "Заманыбыздын супер ырчысы" Бек Борбиев салтка айланган Жаңы жылдык концертинин 2-күнүн берүүдө.

Бек Борбиевдин айтымында, 1-январда болгон концерти да аншлаг менен өткөн. Ырчы менен маектешкенибизде "жыл сайын 1-2-январда концерт берүүнү салтка айланткам. Быйылкы концертимдин өзгөчөлүгү - катышуучулардын көпчүлүгү эркектер, 3 гана айым бар, бийчилерди кошпогондо" деп баса белгилеп өттү.

Концертке конок катары бир топ ырчылар, куудулдар, актриса Асема чакырылыптыр. Коноктордун ичинен алгач "Жылдын супер ырчы мырзасы" Нурлан Насип сахнага чыгып, элди Жаңы жылы менен куттуктап, "Менин да сүйүүм ушундай" чыгармасын "Миң кыял" бийчилер тобунун коштоосунда аткарды. Аны менен катар Бек агасы менен дуэт аткарганга жетишти.

Нурландын артынан чыккан ырчы Мирлан Баеков элди майрамы менен куттуктап, ыр белек сунду. Ал эми эл алдына чыккан куудулдар Кубик Калыков, Абды Кадырматов, Борончу Кудайбергенов жана Анара Жантөрөевалар үй-бүлөлүк жашоодон алынган "Балык" сатирасын ойношту.

Автор: Дамира Арстанова
Фото: Дамира Арстанова, Ташболот Досалиев