АКШдагы президенттик шайлоо: Харрис жеңилгенден кийин алгачкы ирет эл алдына чыкты

АКШнын Демократиялык партиясынан президенттикке талапкер жана азыркы вице-президент Камала Харрис шайлоодо утулуп калгандан кийин Вашингтондогу Говард университетинде коомчулуктун алдына чыгып, сөз сүйлөдү. Бул туурасында чет элдик басылмалар жазышты.

Харрис колдоочуларына, командасына, күйөөсүнө жана президент Жо Байденге ыраазычылык билдирип, президенттик шайлоого жарышка чыкканы менен сыймыктанарын айтты.

Вице-президент Дональд Трампка чалып байланышканын билдирип, ага бийликти тынчтык жолу менен өткөрүп алууга жардам берерин билдирген.

Харрис ошондой эле "америкалыктар белгилүү бир президентке же партияга эмес, АКШнын Конституциясына берилген" деп баса белгиледи.

Белгилей кетсек, 5-ноябрда АКШда президенттик шайлоо болду. Алдын ала маалыматтар боюнча, Трамп 277 добуш алып, жеңишке жеткен. Ал эми анын атаандашы Харрис 224 добуш алган.

Автор: Замира Ниязбекова