Жээнбек Кулубаев менен Япониянын ТИМ башчысы телефондон сүйлөштү

Тышкы иштер министри Жээнбек Кулубаев Япониянын жаңы дайындалган тышкы иштер министри Такеши Ивая менен телефон аркылуу сүйлөштү. Бул боюнча министрлик билдирип, баарлашуу 7-ноябрда жапон тараптын демилгеси менен ишке ашканын маалымдады.

Анда Кулубаев кесиптешин жооптуу кызматка дайындалышы менен куттуктап, ага жүктөлгөн милдеттерин аткарууда ийгиликтерди каалады.

Тараптар кыргыз-жапон мамилелеринин учурдагы маселелерин талкуулап, кызматташтыкты мындан ары бекемдөө келечеги тууралуу пикир алмашышты.

Эки министр тең президент Садыр Жапаровдун 2023-жылы ноябрь айында Японияга болгон расмий сапарынын жемиштүү жыйынтыктарын белгилешти жана жетишилген макулдашууларды жана демилгелерди мындан ары ишке ашыруунун маанилүүлүгүн белгилешти.

"Борбордук Азия + Жапония" диалогуна, атап айтканда, көп тараптуу өз ара аракеттенүү үчүн маанилүү аянтча катары саммитке даярданууга өзгөчө көңүл бурулду. Кулубаев аталган форматтын алкагында кызматташтыкты кеңейтүүнүн маанилүүлүгүн баса белгилеп, аймактык туруктуулукту бекемдөөдө жана туруктуу өнүгүүнү илгерилетүүдө анын негизги ролун белгиледи.

Жыйынтыгында Жээнбек Кулубаев Такеши Иваяны эки тараптуу кызматташтыкты тереңдетүү боюнча мындан аркы кадамдарды талкуулоо үчүн Кыргызстанга расмий сапар менен келүүгө чакырды.

Автор: Айжанар Рыспек кызы
Фото: ТИМ