Министр Бейшеналиев таанышы аркылуу төмөн ставка менен жумушка кирип алган дарыгерлер бар экенин айтты

Бүгүн, 11-ноябрдагы Жогорку Кеңештин Бюджет, экономикалык жана фискалдык саясат боюнча комитетинин жыйынында депутат Улукбек Ормонов дарыгерлерди төмөн ставкалар менен жумушка алууга чектөө киргизүүнү сунуштады.

Ал бул ыкма дарыгерлердин эмгек акысын көтөрүүгө өбөлгө түзөрүн белгиледи.

“Кырсык болуп Улуттук госпиталга барып калсам, дарыгерлер мени өздөрү чакырып кагаздарын көрсөтүштү. Колуна тийген айлыгы 11-12 миң сом. Көрсө, алар 0,5 ставка менен иштейт экен. Аймактарда дарыгерлер жетишпей жатса, аларды ким 0,5 ставка менен жумушка алып жатат? Эмне себептен ушундай болуп жатат? Андан көрө 1 ставка менен жумушка алып, жогору айлык менен иштесин. Анда мен силер "жарым күн иштейсиңерби?" десем, "жок, 1 күн" дешти. Негизи 0,5, 0,25 деген ставкаларды жок кылыш керек. Дарыгерлердин айылыгы көп болуп, алар оорулуунун чөнтөгүн карабай тургандай кылышыбыз керек", - деди Ормонов.

Саламаттык сактоо министри Алымкадыр Бейшеналиев мындай ставкалар менен Ош жана Бишкек шаарларында тааныштары аркылуу кирген дарыгерлер бар экенин белгилеп, алдыда дарыгерлердин бардыгын 1 ставка менен жумушка алуу каралып жатканын айтты.

Автор: Кылымбек Бейшеев
Фото: Интернеттен алынды