Депутат Акаевди көп суммага салынганы жаткан мектептер таң калтырды

Бүгүн, 13-ноябрдагы Жогорку Кеңештин жыйынында депутат Жанар Акаев дээрлик жарым миллиард долларга 9 мектеп куруларына таң калды.

Жыйында Кыргызстан менен Евразия өнүктүрүү банкынын ортосундагы тогуз мектеп куруу боюнча гранттык макулдашууну ратификациялоо маселеси каралып жаткан. Анда билим берүү министринин биринчи орун басары Бекжан Супаналиев Евразия өнүктүрүү банкынан берилүүчү гранттын жалпы суммасы 400-450 миллион долларды түзөрүн билдирди.

Акаев мектеп курууга көрсөткөн көмөгү үчүн Орусия өкмөтүнө ыраазычылыгын билдирип, бирок мындай суммага 9дан көп билим берүү мекемелерин салса болорун айтты.

"Албетте, эл аралык стандартка жооп бергени жакшы. Бирок ушунча суммага 9 эле мектеп курабызбы? 30ду куруп койсо болот го. Ошондо 1 мектеп 50 миллион долларга курулабы?" - деди ал.

Супаналиев ар бир мектеп 26 миң чарчы метрди ээлей турганын, ичинде 2 актовый зал, 2 спорт зал, 2 бассейн, лаборатория жана мыкты жабдуулары болорун белгиледи.

Автор: Кылымбек Бейшеев
Фото: Интернеттен алынды