Милиция Бишкекте Honda Fit унаасы менен түнкүсүн тоноочулукка чыгып жүргөндөрдү кармады

Бишкек шаарынын аймагында Honda Fit үлгүсүндөгү автоунаа менен бир катар талап-тоноочулукка барып жүргөнгө шектүүлөр кармалды. Бул тууралуу Бишкек шаардык ички иштер башкармалыгы кабарлады.

Милициянын маалыматына ылайык, 23-октябрь күнү Бишкек шаарынын Свердлов райондук ички иштер башкармалыгына А.Б. аттуу жаран арыз менен кайрылган. Арызында ал эртең мененки саат 05:30 чамасында Карагач токоюнун аймагында жүргөн белгисиз адамдардын тобуна карата чара көрүүнү суранган.

Бул факт боюнча кылмыш-жаза кодексинин 206-беренеси ( тоноо) менен кылмыш иши козголгон.

Милиция кызматкерлери тарабынан кылмышкерлер кылмыштуу аракеттерин Honda Fit үлгүсүндөгү унаа менен жасагандыгы аныкталган. Мындан тышкары, кызматкерлерге борбор калаанын аймагында белгисиз адамдар ушул эле унаа менен шаардыктарды тоноп жатканы тууралуу маалымат болгон.

Жыйынтыгында милиция кызматкерлери 2004-жылы туулган Ж.А., 2001-жылы туулган Т. К. жана 1998-жылы туулган А.Т. аттуу жарандарды кармашкан.

"Козголгон кылмыш ишинин алкагында кылмышкерлер күрөөканаларга өткөрүп берген кылмыш жолу менен алынган уюлдук телефондор алынган, ал эми түшкөн акча каражаты жеке керектөөлөрүнө жумшалган. Азыркы учурда алардын башка ушул сыяктуу кылмыш фактыларын жасоого катыштыгы бар экендиги аныкталууда", - деп билдиришти Бишкек ШИИБден.

Автор: Азат Бейшенбеков