Вьетнамдык 22 жаштагы кыз дүйнөдөгү эң сулуу кыз деп таанылды

Дүйнөдөгү төрт негизги эл аралык сулуулар сынактарынын бири болгон “Miss International” сынагын вьетнамдын Хюинь Тхи Тхань Тхюи жеңип алды. Сынактын финалы YouTube каналда түз эфирде көрсөтүлдү.

"Miss International 2024" сынагынын финалы 12-ноябрда Япониянын борбору Токио шаарындагы "Tokyo Dome" стадионунда өттү. Иш-чара дүйнө жүзү боюнча көрүүчүлөргө түз эфирде көрсөтүлдү.

Анда дүйнөнүн эң сулуу кызы наамын 22 жаштагы студент кыз алды. 2022-жылы ал улуттук "Мисс Вьетнам" сынагында жеңүүчү болгон. Кыз эки университетте окуп, модель болуп иштейт. Мындан тышкары ал англис жана корей тилдерин билет.

Белгиленгендей, Хюинь Тхи Тхань Тхюи бул сынакты жеңген алгачкы вьетнамдык кыз болду.

Автор: Азат Бейшенбеков