Өзбекстандын өкмөтү отставкага кетти

Өзбекстандын Министрлер кабинети жаңы шайланган Олий Мажлис (парламент) алдында отставкага кеткенин жарыялады. Буйрукка 19-ноябрда премьер-министр Абдулла Арипов кол койду. Бул тууралуу өзбек басылмалары жазышууда.

Премьер-министрдин басма сөз катчысы Бекзод Хидоятовдун айтымында, президенттин жарлыгына ылайык, өкмөттүн ишинин үзгүлтүксүздүгүн камсыздоо максатында азыркы өкмөт жаңы кабинет түзүлгөнгө чейин өз ишин уланта берет.

Олий Мажлистин депутаттарын шайлоодон кийин өкмөт, анын ичинде премьер-министр жана министрлер жаңы шайланган парламентке өзүнүн ыйгарым укуктарынан баш тартат (Конституциянын 116-беренесине жана Министрлер кабинети жөнүндө мыйзамдын 7-беренесине ылайык). Бул – мыйзам чыгаруу органы жаңылангандан кийин аткаруу бийлигин кайра иштетүүгө багытталган стандарттуу процедура.

Жаңы парламент түзүлгөндөн кийин бир айдын ичинде Өзбекстандын президенти саясий партиялардын бардык фракциялары менен кеңешип, премьер-министрдин талапкерлигин Мыйзам чыгаруу палатасынын кароосуна киргизет.

Премьер-министрдин макулдугунан кийин жаңы өкмөттү түзүү башталат.