Бишкекте денеге келтирилген оор залакаттын кесепетинен каза тапкан аялдын өлүмүнө шектүү жаран кармалды. Бул тууралуу бүгүн, 20-ноябрда шаардык милициядан билдирди.
Маалыматка ылайык, милицияга 9-ноябрга караган түнү саат 03:00 чамасында калаадагы Каховская жана Үч-Терек көчөлөрүнүн кесилишинде болжолдуу жашы 30-35 жаштагы европа улутундагы белгисиз аялдын жансыз денеси жатканы тууралуу билдирүү келип түшкөн. Маркум 1986-жылы туулган Н.В. аттуу жаран экени аныкталган.
Аталган факты боюнча Кылмыш-жаза кодексинин 130-беренесинин 3-бөлүгү (Өлүмгө алып келүү менен ден соолукка оор залал келтирүү) менен кылмыш иши козголуп, соттук-медициналык экспертиза дайындалган. Жыйынтыгында маркумдун денесинин опурталдуу бөлүктөрүнөн алган жаракаттарынан улам каза болгону аныкталган.
Ыкчам издөө иш-чараларынын алкагында кылмышка шектүү катары 1991-жылы туулган П.Д. аттуу жаран кармалып, 2 айга камакка алынды.
Учурда тергөө амалдары уланууда.
