Гетц сексуалдык жаңжалдан улам АКШнын башкы прокурорлугуна талапкер болуудан баш тартты

АКШнын жаңы шайланган президенти Дональд Трамп тарабынан башкы прокурорлукка сунушталган экс-конгрессмен Мэтт Гетц резонанстуу сексуалдык жаңжалдан улам талапкерлигин алып салды. Бул тууралуу саясатчы X социалдык тармагындагы (мурдагы Twitter) баракчасына жазды.

Гетц бул чечимин ага байланышкан педофилия чатагы Трамптын өткөөл командасын ишинен алаксытат деп түшүндүрдү.

"Мен сенаторлор менен эң сонун жолугушууларды өткөрдүм жана алардын ой-пикирлерин, ошондой эле көптөгөн адамдардын укмуштуудай колдоосун баалайм. Бирок менин билдирүүм Трампты маанилүү ишинен ашыкча алаксытуу болуп калганы анык. Вашингтондо ашыкча узакка созулган тирешүүлөргө коротууга убакыт жок, ошондуктан мен башкы прокурорлукка талапкерлигимди кароодон алып жатам", - деди ал.

Өзүнүн чуулгандуу репутациясы менен белгилүү болгон Гетц 17 жаштагы жашы жете элек кыз менен жыныстык катнашта болгон, баңгизат колдонгон жана шайлоо өнөктүгүнүн каржысын кыянаттык менен пайдаланган деген айыптоолор боюнча иликтөөлөрдүн чордонунда болгон.

2020-жылы Гетц сексуалдык кызматтарды пайдаланган, анын ичинде жашы жете элек кыз менен интимдик мамиледе болгон деген шек менен федералдык тергөө башталган, бирок кийинчерээк ага коюлган айыптардын баары алынып салынган.

14-ноябрда АКШнын Юстиция министрлигинин кызматкерлери Трамптын Гетцди департаменттин жаңы жетекчиси кылып дайындоо идеясына нааразылык билдирип жатышканы белгилүү болгон. Республикачыл сенаторлор анын сексуалдык асылуу жана баңгизат колдонгон деген айыптоолор боюнча иштерин кайрадан иликтөөнү демилгелеген.

Автор: Бек Оморбеков