Чүйдө жаран 44 миң долларга бааланган 2 унаасын алдаткан. Шектүү кармалды

Сокулук районунда ири алдамчылыкка шектелген жаран кармалды. Бул тууралуу Чүй облустук ички иштер башкы башкармалыгы билдирди.

Маалыматка ылайык, 16-апрелде милицияга 38 жаштагы жаран арыз менен кайрылган. Ал былтыр 1-декабрда СРиом-Авто аталышындагы унаа базарынан шектүүгө Toyota RAV-4 XLE жана Geely Coolray үлгүсүндөгү унааларын алдатып ийгенин айткан. Натыйжада жабырлануучу 44 миң доллар зыян тарткан.

Бул факты боюнча Кылмыш-жаза кодексинин 209-беренесинин (Алдамчылык) негизинде кылмыш иши козголгон. Шектүү катары мурда сот жообуна тартылган 43 жаштагы жаран кармалып, убактылуу кармоочу жайга киргизилген.

Учурда тергөө иштери уланууда.

Автор: Кылымбек Бейшеев
Фото: Чүй ОИИБ