"Элкарт" шылуундар көбөйүп жатканын эскертти. Чоо-жайы

"Банктар аралык процессинг борбору" ЖАК ("Элкарт" улуттук төлөм системасынын оператору) соңку убакта шылуундар көбөйгөнүн эскертип, алардын торуна түшпөө үчүн эмнеге көңүл буруу керектигин тизмектеди.

"Урматтуу колдонуучулар, сиздин көңүлүңүздү акча каражаттарына жетүү максатында таркатылып жаткан алдамчылык почта жөнөтүү фактыларынын көбөйүп жаткандыгына бурабыз. Шылуундар үчүнчү тараптын ресурстарына шилтемелер менен коштолгон арзандатуулар, белектер же жарнамалык сунуштар менен билдирүүлөрдү жөнөтүшөт. Абайла! Белгисиз булактардан келген шектүү билдирүүлөр, атүгүл тааныш аккаунттар кибер алдамчылык аракети болушу мүмкүн", - деп айтылат анда.

Эскерте кетсек, "Элкарт" улуттук төлөм системасы эч качан мессенджерлер, почталар же башка байланыш каналдары менен шектүү шилтемелер аркылуу картанын маалыматтарын сурабайт. Акыркы убакта шылуундар "Элкарт" брендин пайдаланып, жалган билдирүүлөрдү жасап жатышат. Бул жалган билдирүүлөрдүн бири - "Уурдалган акчаны кайтаруу боюнча расмий программа" бар делген билдирүү. Мындай билдирүүлөрдүн "Элкарт" улуттук төлөм системасы менен эч кандай байланышы жок экенин расмий түрдө билдиребиз.

Өзүңүздү жана аманатыңызды коргоо үчүн:

Эч качан шектүү шилтемелерге кирбеңиз.
Өзүңүздүн жеке маалыматтарыңызды (логиндер жана сыр сөздөр) үчүнчү жактар менен бөлүшпөңүз.
Текшерилбеген сайттарга жеке маалыматыңызды киргизбеңиз.
Эгерде сизди кандайдыр бир шектенүүлөр же бир нерсе тынчсыздандырса, дароо расмий веб-сайтта көрсөтүлгөн расмий байланыш каналдары аркылуу колдоо кызматына кайрылыңыз.
Каражаттарыңызга кам көрүңүз жана текшерилген маалыматка гана ишениңиз!

"Элкарт" - ар дайым жаныңызда!