"Жалпы 224 миң сомдук протокол түзүлдү". Бишкекте башаламан соодага каршы күрөшүү чаралары күчөтүлдү

Бишкекте Муниципалдык инспекция "Ала-Тоо" аянтында, Панфилов паркында, Чүй проспектисинде жана башка эл көп чогулган жерлерде башаламан сооданы жоюу боюнча чараларды күчөттү. Бул тууралуу бүгүн, 5-декабрда Бишкек мэриясынан билдиришти.

Маалымдалгандай, соода эрежелерин бузгандыгы үчүн жалпысынан 224 миң сомго 68 протокол түзүлүп, борбордук аянттын аймагында 18 миң сомго 6 протокол түзүлдү.

Ал эми Панфилов сейил багында электр тармагы уруксатсыз кошулган. Мыйзамсыз тартылган зымдар алынды.

Мындан тышкары ГУМ жана ЦУМ соода борборунун аймагында күзөт иштери күчөтүлдү. Ал жерде 9 миң сомго 3 протокол түзүлгөн. Түшүндүрүү иштери жүргүзүлүүдө.

Белгилей кетсек, белгисиз жерлерде соода кылгандыгы үчүн мыйзамдарга ылайык, 3000 сомдон 13 миң сом өлчөмүндө айып пул салынат.