Бишкекте унаалардын катализатору текшерилди

Бишкек шаарынын мэриясы борбордогу унаалардын катализаторун текшерүү боюнча рейд уюштурду. Бул тууралуу кечээ, 5-декабрда Бишкек мэриясынан билдиришти.

Маалым болгондой, анда автоунаалардын катализатору, бөлүнүп чыккан түтүндүн жаратылышка зыяндуулугу текшерилди.

"Жыйынтыгында борбордогу унаалардын басымдуу бөлүгү көмүр кычкыл газын нормадан көп бөлүп чыгара турганы аныкталды. Айрым унааларда чыккан түтүндү чыпкалай турган катализатор жок болуп чыкты. Мындай жагдайлар аныкталган учурда Укук бузуулар жөнүндө кодекске ылайык айдоочуларга протоколдор түзүлөт", - деп айтылат маалыматта.

Ага ылайык, Бишкек мэриясы катализатор сатуучу пункттарды ачууну пландоодо. Аталган жайларда түтүндү чыпкалай турган жабдык базар баасынан үч эсе арзан болот.

Белгилей кетсек, мындай чара борбордун атмосфералык абасынын абалын жакшыртууга багытталган. Мындай рейддик иш-чаралар улантылат.

Маалымат үчүн: Расмий статистика боюнча Бишкек шаарынын аймагында 400 миңден ашык унаа катталган. Андан тышкары аймактардан келген унааларды кошо эсептегенде шаардагы унаалардын саны 500 миңден ашат.