Кыргызстан төрөт үйлөргө керектүү дары-дармектер менен гуманитардык жардам алды

Бүгүн, 10-декабрда саламаттык сактоо министри Алымкадыр Бейшеналиев Бириккен Улуттар Уюмунун Калкты жайгаштыруу фондунун (ЮНФПА) кеңсесинин башчысы Бактыбек Кайназаров менен жолугушту. Бул тууралуу министрликтен билдиришти.

Жолугушууда тараптар үй-бүлөнү пландаштыруу, репродуктивдүү ден соолук жаатындагы медициналык мекемелерде кызмат көрсөтүүнүн сапатын жогорулатуу сыяктуу тармактарда биргелешкен өз ара аракеттенүү маселелерин талкуулашты.

Бактыбек Кайназаров ЮНФПА Кыргызстандын төрөт үйлөрүндө төрөттөн кийинки кан жоготууну алдын алуу жана дарылоо үчүн заманбап дары – карбетоциндин биринчи партиясын тапшырып жатканын белгиледи.

"Гуманитардык жардамдын алкагында төрөттөн кийинки кан жоготуунун алдын алуу үчүн 170 миң аялга жалпы суммасы 92 миң долларга 17 миң куту жеткирилди", - деп жазылат анда.

Автор: Айжанар Рыспек кызы
Фото: Саламаттык сактоо министрлиги