Ошто кайненесин сабады делген жаран 7 суткага камакка алынды . Ага аялы да арыз жазды

Ошто кайненесин сабады делген жаран камакка алынды. Бул тууралуу бүгүн, 11-декабрда облустук милициядан билдирди.

Маалыматка ылайык, 30-ноябрда Кара-Суу райондук ички иштер бөлүмүнө Мады айыл аймагынын 64 жаштагы тургуну арыз менен кайрылган. Ал 29-ноябрь күнү 35 жаштагы Ж.А. аттуу күйөө баласы ур-токмокко алгандыгын билдирген.

Бул факты каттоого алынып, тергөөгө чейинки текшерүү иштери башталган. Жабырлануучуга соттук-медициналык экспертиза дайындалып, анын корутундусуна ылайык, ден-соолукка атайын жеңил зыян келтирилгендиги аныкталган. Жабырлануучунун 1989-жылы туулган Ж.А. аттуу күйөө баласы тергөө кызматына жеткирилген.

Анын үстүнөн Укук бузуулар жөнүндө кодекстин 57-беренесинин (Ден соолукка атайын жеңил зыян келтирүү) негизинде материал топтолуп, райондук соттун кароосуна жиберилген. Бүгүн Ж.А. аттуу жаран Кара-Суу райондук соту тарабынан 7 суткага камакка алынды.

Учурда бул жарандын үстүнөн аялын ур-токмокко алуу фактысы боюнча дагы тергөөгө чейинки текшерүү иштери жүрүп жатат. Тагрыаагы, 2-декабрда Кара-Суу РИИБге 24 жаштагы И.М. аттуу жаран арыз менен кайрылган. Ал 29-ноябрда Ж.А. уруп, денесине залал келтиргенин билдирген.

Бул факты каттоого алынып, тергөөгө чейинки текшерүү иштери башталган. Жабырлануучуга соттук-медициналык экспертиза дайындалган. Анын жыйынтыгы менен кылмыш ишин козгоо маселеси каралууда.

Автор: Бек Оморбеков
Фото: Ош ОИИБ