Эдил Байсалов Олимпиада оюндарына даярдык боюнча жыйын өткөрдү

Министрлер кабинетинин төрагасынын орун басары Эдил Байсалов 2028-жылы Америка Кошмо Штаттарынын Лос-Анджелес шаарында өтө турган 34-Олимпиада оюндары жана 18-Паралимпиадалык оюндарга карата даярдыктарды талкуулаган жыйын өткөрдү. Бул тууралуу Министрлер кабинетинен билдиришти.

Анда ушул жылы Парижде өткөн 33-жайкы Олимпиада оюндарындагы жетишкендиктер жана кемчиликтер талкууланды.

“Париж Олимпиадасына дүйнөнүн 206 өлкөсүнөн 10 миңден ашык спортчу катышып, Кыргызстан 16 спортчусу менен 206 өлкөнүн ичинен медалдык эсеп боюнча 68-орунга ээ болду. Ал эми Олимпиада оюндарына Азия чөлкөмүнөн катышкан 44 өлкөнүн ичинен биздин өлкө 15-орунду ээледи. Катышкан 16 спортчубуздун алтоо байге менен кайтып келип, барган спортчулар менен жеңген медалдарынын катышы боюнча биздин өлкө 206 мамлекеттин сап башында турду”, - деди Эдил Байсалов.

Жыйындын жыйынтыгында Маданият, маалымат, спорт жана жаштар саясаты министрлигинин Дене тарбия жана спорт департаментине алдыдагы оюндарга даярдык көрүү боюнча бир катар тапшырмалар берилди.