АКШ Түндүк Кореянын аскерлери тууралуу маалымат таратты

АКШнын Улуттук коопсуздук кеңешинин өкүлү Жон Кирби жума күнү Түндүк Кореянын аскерлери Курск аймагындагы украин позицияларына чабуул жасап жатканын билдирди. Бул тууралуу чет элдик басылмалар жазды.

Анын айтымында, Түндүк Кореянын аскер бөлүктөрү натыйжасыздыгына жана оор жоготууларга карабастан чабуул жасоо үчүн "массалык жөө аскерлер толкундарын" колдонууда. Кирби согушкерлер үмүтсүз көрүнгөн шарттарда да алдыга жылышын улантып, айрымдары колго түшүп калса, үй-бүлөлөрүнө каршы репрессиялардан коркуп, өз жанын кыйганын баса белгиледи.

Ал Орусия болсо Украинанын чыгышындагы басымын күчөтүп, энергетика тармагына чабуулун улантып жатканын кошумчалады. Буга жооп иретинде АКШ Киевге аскердик жардамдын жаңы пакетин даярдап, Орусиянын аймагындагы бутага каршы курал колдонууга чектөөлөр күчүндө экенин белгиледи.

Түштүк Кореянын чалгын кызматы Түндүк Кореянын Орусиядагы аскерлеринин санын 11 миң адам деп эсептейт, ал эми жоготуулар Сеул менен Киевдин эсебинде миңдеп саналат.

Кирби чет элдик аскерлердин орус жергесинде колдонулушун “тарыхый болуп көрбөгөндөй кадам” деп атап, Орусия мындай ыкмаларды колдонууну улантып жатканына өкүнүчүн билдирди.

Автор: Бек Оморбеков